Albisteak

Albistea

Urriaren 12tik 16ra bitartean ospatuko da Bermeoko Mareak Jaialdia

-Tradizioa eta abangoardia batzen dituen Mareak Jaialdiak bere zazpigarren edizioa ospatuko du datorren astean

Bermeon, 2021eko urriaren 5ean.- Mareak Jaialdiaren zazpigarren edizioa urriaren 12tik 16ra bitartean ospatuko da. Beleza Malandra Ateneo Kulturalak eta MB2000-ak -Bermeoko Udalaren, Bermeoko Kafe Antzokiaren eta Bizkaiko Foru Aldundiaren laguntzarekin- antolatzen duen ekimen honek abangoardia eta tradizioa batzen dituzten hainbat arte-diziplinatako ekimenak eskainiko ditu. Honela, jaialdi honetan, adin eta kultur ezagutza ezberdinetako pertsonak elkartuko dira, munduan zeharreko egitasmo txiki eta ederrez gozatzeko.

Jaialdi honen zazpiarren edizioak hainbat eszenatokitan egingo diren hamaika ekitaldi kulturalekin (kontzertuak, ipuin kontalariak, proiekzioak…) gozatzeko aukera eskainiko die bertaratzen diren pertsona guztiei. Prestatu diren ekimen batzuk doakoak izango dira (erreserba egitea behar beharrezkoa izango da) eta, besteak, ordainpekoak. Sarrera guztiak eskuragarri daude www.bermeokokafeantzokia.com webgunean. Noski, ekitaldi guztiek indarrean dauden osasun eta segurtasun neurriak beteko dituzte.

Ekintza asko egongo dira programatuta datorren astean zehar. Besteak beste, urriaren 12an, ibilaldi interesgarri bat egingo da Katilotxu mendira. Juan Carlos Lopez Quintanaren eskutik, Katilotxuko dolmena izango da hizpide doako irteera honetan. Urriaren 13an, aldiz, Naita Produkzioak-en eta Nerea Ariznabarreta aktoresaren eskutik, “Mito izaki eta kondairak” helduei zuzendutako ipuin kontalaria izango dugu Nestor Basterretxea aretoan. Sarrera doakoa izango da. Hurrengo egunean, urriaren 14an, Frantziskotarren Klaustroan, Jorge Garridok “Hariak eta teklak” kontzertua eskainiko du. Sarrerek 4 euroko prezioa izango dute.

Urriaren 15ean, ostiralean, hainbat ekintza programatu dira. Besteak beste, Kurtzion, Dream Division proiektua ezagutu ahal izango dugu. Sintetizadoreen bitartez, istorioak kontatuko dizkigute. Sarrerak 6 euroko prezioa izango du. Larunbatean, azken egunean, Nestor Basterretxea aretoan zine foruma izango dugu: “Antzinakoarekiko loturak artearen bidez” izenpean, bi dokumental ikusteko aukera egongo da. Sarrera doakoa izango da. Azkenik, arratsalderako bi ekintza oso interesgarri antolatu dira: Candelabre hirukotearen kontzertua Beleza Malandran (sarrera 6 euro) eta Kafe Antzokian programatutako beste hiru kontzertu (Sieben, Kabbalah eta No Sanctuary). Azken honetarako sarrerek 12 euroko prezioa izango dute.

 

05 / 10 / 2021

Beste barriak

Bermeoko Udala

010 (94 617 91 00)
Arana eta Goiri tar Sabinen
enparantza z/g
48370 Bermeo - Bizkaia
antolakuntza@bermeo.eus

bikain ziurtagiria WAI-AA WCAG 1.0