Bermeoko Udala

Bermeoko Udalak eta Salica enpresak elkarlanean hainbat saio egin dituzte langileen artean euskaraz berba egiteko ohitura zabaltzeko eta, ahal den neurrian, euskara laneko hizkuntza izateko, eta prozesuaren balorazioa oso ona izan da alde guztietatik. 

Horrela adierazi dute gaur egindako prentsaurrekoan Juan Karlos Agirrek, Euskara Saileko zinegotziak, Maite Alvarezek, Euskara teknikariak, Aintzi Laburuk, Salica enpresako Marketin zuzendariak eta Amaia Astobizak, Elhuyar Aholkularitzako teknikariak. Agirrek azaldu duenez, Bermeoko Udaleko Euskera sailak euskararen inguruan motibazioa eta sentsibilizazioa lantzeko saioak egiteko proposamena egin zion Salicako zuzendaritzari. Salicak onartu egin zuen, eta bi talde jarri ziren martxan: komitea (lau langilerekin) eta bulegoa (9 langilerekin). Motibazio-saioak Elhuyar Aholkularitzako teknikariek gidatu dituzte. 

Alvarezek nabarmendu duenez, Salican egindako lana oso emankorra izan dela, batez ere langileek hutsik egin gabe eta gogotsu parte hartu dutelako eta hasiera-hasieratik erakutsi dutelako ezarritako helburuak lortzeko jarrera egokia. 

Parte-hartzaileek eurek adierazi dutenez, prozesu honetan egindako lanak aurrerapauso nabarmena ekarri du euskararen erabileran. “Gure arteko harremanetan aldaketa handia sumatu dugu”, adierazi du Laburuk. “Euskaraz berba egiteko gai ez zirela uste genuen lankideekin ere euskaraz egiten dugu orain, eta hori ikaragarria da, oso pozgarria.” 

Amaia Astobizak adierazi duenez, esku-hartzearen lehenengo saioan, jarrera kontziente eta positiboak landu ziren. Besteak beste, lankideek hizkuntzarekin izandako bizipen eta esperientziak ezagutu zituzten, eta lanean euskara gehiago erabiltzeko aukerak aztertu zituzten. Horretaz gain, langileek konpromiso pertsonalak eta taldekoak hartu zituzten. 

Bigarren saioaren hasieran, parte-hartzaile gehienek adierazi zuten euskaraz gehiago hitz egiten zutela, bai lan-eremuan bai lanetik kanpora. “Esate baterako, bulegoko langile batek esan zigun txipa erabat aldatu zuela; lehenengo saioan esaten zuen bera oso eroso bizi zela erdaraz eta ez zuela bere hizkuntza-ohitura aldatzeko asmorik, eta bigarren saiorako aitortu zuen euskaraz egiten zuela gehienekin, bai bulegoko lankideekin baita lanetik kanpoko batzuekin ere”, azaldu du Alvarezek. Saio honetan, euskara lan-hizkuntza izateko pausoak ematen hasi ziren, euskaraz egin daitezkeen lanak identifikatuta eta horretarako baliabideak jarrita. 

Hirugarren saioan, ordura arteko lanaren emaitzaren balorazioa egin zen, eta euskararen inguruko datu batzuk ezagutu zituzten. Lanari dagokionez, langileek azaldu zuten mezu elektronikoak euskaraz bidaltzen hasi direla, batzar batzuk  euskaraz egiten dituztela eta bulegoko kartelak euskaraz jartzen hasi direla. “Kontuan hartuta orain arte mezuak beti gaztelaniaz idatzi izan direla eta batzarrak beti gaztelaniaz egiten zirela, egin dugun aurrerapena ez da makala”, esan du Laburuk. 

Datuetara etorrita, komiteko langileek kasuan, hasieran % 8k egiten zuen dena euskaraz, eta saioen amaieran, berriz, % 92k. Bulegoko langileen kasuan, hasieran  % 21ek egiten zuen dena euskaraz, eta amaieran, ostera, % 72k. Kontuan hartu behar da, gainera, hizkuntza-hautua, batzuetan, kanpo-faktoreen menpe egoten dela: euskaraz ez dakien lankidea, euskalduna ez den bezeroa... 

Hiru saio horien ostean, eta Maite Alvarezek azaldu duenez, “bulegoko langileek azkeneko bi hilabeteetan izan duten bilakaera ikusita eta taldearen ezaugarriak kontuan hartuta, hizkuntza-ohituran eragitea helburu duen Berbasarea esku-hartzean parte hartzeko proposamena egin genien, eta gogo onez onartu zuten”. 

Amaia Astobizak azaldu du Berbasarea zer den, hizkuntza-ohituran eragiteko interbentzioa, eta egindakoaren xehetasunak eman ditu. Helburua da euskaldunen artean gaztelaniaz egiten diren elkarrizketa eta harremanak aurrerantzean euskaraz egiteko ohitura hartzea. 

Horretarako, lehenengo bi hilabeteetan saregile bi izendatu dira, gainerako lankideei beti euskaraz berba egiteaz arduratu direnak. Pertsona horien eragina talde guztira zabaltzen da, eta, esku-hartzearen amaieran, euskaraz berba egiteko ohitura finkatuta geratzen da, neurri handi batean. 

Astobizaren hitzetan, “bulegoko langileekin lortu dugun emaitza benetan ikusgarria izan da. Langileak euskaraz ari dira ia ehuneko ehunean, eta aurrerantzean ere berdin jarraitzea espero dugu. Euskarak bulegoan bere lekua egitea lortu dugu, eta bai langileak eta bai Euskara Sailekoak oso pozik gaude lortutako emaitzarekin”. 

Horrenbestez, Agirrek, Alvarezek, Laburuk eta Astobizak Salican euskararen erabilera bultzatzeko egindako motibazio-saioen balorazio guztiz positiboa egin dute. 

Alvarezek azpimarratu duenez, Salica jokabide eredugarria eta aitzindaria erakusten ari da, alde batetik, langileen parte hartzea eta ahalegina apartekoak izan direlako eta beste aldetik, beharrezkoa den zuzendaritzaren babespean garatzen ari delako lan hau guztia. Izan ere, Alvarezen berbetan, “euskarak arlo sozio-ekonomikoan asko dauka aurreratzeko, gazteak prestatuta daude lanean euskara erabiltzeko eta honelako ekimenei esker pausoz pauso lan munduan euskarak bere bidea egiten du”. 

Agirre zinegotziak mota honetako ekimenen garrantzia azpimarratu du, eta eskerrak eman dizkio Salicari saio hauetan parte hartu eta euskararen aldeko konpromisoa berresteagatik eta jokaera eredugarri horri eusteko erakutsi duen prestutasunagatik. Aurrerantzean ere, Udala zeregin horretan bidelagun izango dela gehitu du.