Bermeoko Udala

Bermeoko Udalak Itsasertzaren eta Itsasoaren Iraunkortasuneko zuzendaritza nagusiari eskatu dio Aritzatxu hondartzako dikean dagoen zuloa konpontzeko, “estrukturan eragina izan dezakeelako eta istripuak gerta daitezkeelako”.

Benito Ibarrolazak, Bermeoko alkateordeak eta Zerbitzuetako zinegotziak, azaldu duenez, azken itsas denboraleen ondorioz, Aritzatxuko hondartzako dikean zulo bat agertu zen.  Dike horrek hondartzako gune batetik bestera joatea ahalbideratzen du eta, horrez gain, area joatea saihesten du, besteak beste.

Bere esanetan, zulo horrek “dikearen estrukturan eragin handia izan dezake; eta, konpondu ezean, hondartzan istripuak gerta daitezke eta arearen hustuketa areagotu daiteke”.

“Horregatik guztiagatik, zulo horren konponketa derrigorrezkoa dela antzematen da, eta espero dugu Itsasertzaren eta Itsasoaren Iraunkortasuneko zuzendaritzak gure eskaera onartzea eta zuloa konpontzea, beste batzuetan egin duten moduan, Aritzatxuko hondartzan segurtasuna bermatzeko”, gaineratu du.