Bermeoko Udala

Urtarrilaren 30ean, astelehenean, haurren artean literaturarekiko zaletasuna pizteko Kontuleku ekimena berriro jarriko du martxan Bermeoko Udal Liburutegiak. 3 eta 6 urte arteko haurrei zuzenduta, liburuekiko maitasuna sustatzeaz gain, ahozko literaturaren eta irudimenaren munduari esker, umeen eta gurasoen arteko harremanak sendotu nahi dira Kontulekuren bitartez.

Kontuleku tailerra 2017ko urtarrilaren 30etik martxoaren 27ra egingo da Udal Liburutegian, astelehenetan ( 9 saio) . Talde bi antolatuko dira: alde batetik, 3 eta 4 urteko haurren taldea (17.00-18.00), eta, bestetik, 5 eta 6 urtekoena (18.00-19.00). Talde bakoitzean zortzi umek parte hartu ahal izango dute guraso batekin. Jadanik plaza guztiak bete dira.

Liburutegiko arduradunek azaldu dutenez, landuko diren alorren artean daude afektibitatea, psikomotrizitatea, estimulazio goiztiarra eta harremanak, besteak beste. «Gurasoek beren seme-alabekin bizipenak partekatzeko hainbat baliabide aurkituko dituzte espazio honetan: soinu jolasak, jolas lirikoak eta antzerkia», gaineratu dute. Egun bakoitzean jarduera eta gai desberdinak jorratuko dituzte. Gurasoei, bibliografia eta etxean lantzeko jarraibideak emango dizkiete hala nahi izanez gero.