Bermeoko Udala

1.500 ume eta gazte inguru elkartuko dira datorren eguenean, ekainaren 22an, Bermeon ikasturte amaierako jaian. Herriko ikastetxe guztietako 3 urtetik 12 urte bitarteko haurrek ez dute aspertzeko astirik izango, hainbat baitira eurentzat antolatu diren ekimenak: pailazoak, dantzaldia, umeentzako parkea, magia saioa eta zirko ikuskizuna, besteak beste. 

Aingeru Astuik, Bermeoko Kultura zinegotziak, azaldu duenez, festa horrekin, ikastetxe guztietako umeak “ekintza batean elkartu nahi dira egun zoragarri bat igarotzeko”. 

Haurrek adinaren arabera parte hartuko dute antolatutako ekintzetan. Horrela, haur hezkuntzako hiru urtetik gorako umeentzat Kiki, Koko eta Moko pailazoek ‘Katapuntxispun Festa’ ikuskizuna eskainiko dute goizeko 10:30ean Sagrado Corazón ikastetxean. 

LHko 1 eta 2. mailetako haurrek Tor magoaren magia saioarekin gozatuko dute, Bermeoko Kafe Antzokian goizeko 10:45ean. Bestalde, LHko 3. eta 4.mailetako neska-mutilentzat goizeko 10:00etatik aurrera umeentzako parkea egongo da Lameran, eta bertan rokodromoa, txirristak, pista amerikarra, eta ohe elastikoak egongo dira, besteak beste. 

LHko 5. eta 6.mailetako gazteek ‘The Funes Troup’ taldearen eskutik, ‘Funes van’ zirko ikuskizunarekin ondo pasatzeko aukera izango dute goizeko 10:45ean San Frantzisko Herri ikastetxean. 

Ondoren, hainbat mailatako ikasleak batuko dira 12:00etan Lameran Xaiborren ‘Dantzatlon’ diskofestako abesti eta dantzekin gozatzeko. Baina jaia ez da goizean amaituko. Izan ere, arratsaldeko 16:00etatik 19:00etara umeentzako parkea egongo da Lameran. 

Aingeru Astuik egun “polita” izango dela nabarmendu du, eta nagusi, ume eta gaztetxoak jai horretan mahoiez jantzita parte hartzera animatu ditu.