Bermeoko Udala

-Gure kostaldeko altxor geologiko, paleontologiko, paisajistiko eta naturalei buruzko informazioa erakusten du, baita orain arte inguru horretan egindako lanen xehetasun guztiak ere

-Udalak laster hasiko du naturagunea berreskuratzeko lanen bigarren fasea zonaldea ingurumenaren ikuspegitik ahalik eta gehien berreskuratzeko. Udalaren jabetzaren lurretan jardungo da,  123.400 euro bideratuko dira, eta Etxebizitza Sailaren eta Europar Batasunaren LIFE - Urban Klima 2050 Programaren dirulaguntzak izango dira

Bermeon, 2023ko martxoaren 10ean.-. Tala eta Aritzatxuko hondartza lotzen dituen pasealekua lotu dituen 300 metro inguruko esku-hartzearen ondoren, Bermeoko Udalak, Eusko Jaurlaritzaren laguntzarekin, informazio-panel bat jarri du aste honetan bertan, berreskuratu berri den eremu horren ingurumen-erakargarritasun guztiak jasotzen dituena.

Panel honetan, besteak beste, gure kostaldeko altxor geologiko, paleontologiko, paisajistiko eta naturalei buruzko informazioa erakusten da (itsaslabarrak, fosilak, fauna, flora), baita orain arte inguru horretan egindako lanen xehetasun guztiak ere. Era berean, totemak Tonpoik bermeotarrei eta bisitariei eskaintzen dizkien erakargarritasun guztiak erakusten ditu. Izan ere, paseatzeko eta biodibertsitateaz gozatzeko paisaia-erakargarritasun handiko gunea da; CO2 xurgatzen eta kanporatzen duen naturagunea, beroari aurre egiteko zuhaizti itzaltsuak dituena.

Bestalde, joan den udan amaitu zen lehen faseko lanen ondoren, Bermeoko Udalak laster ekingo dio naturagunea berreskuratzeko lanen bigarren faseari, ingurumenaren ikuspegitik eremua ahalik eta gehien errekuperatzeko helburu nagusiarekin.

“Lehenengo fasearen ondoren, martxan jarriko gara berriro, eta laster bigarren faseari ekingo diogu, ingurumena erabat errespetatzen duen herriko gune eder bat berreskuratzeko. Herriari dagokion espazioa itzuli nahi diogu, itsasertzean dagoen erabilera publikoko berdegune hori berreskuratuz”, adierazi du Aritz Abaroa alkateak.

Oraingoan, 123.400 euro bideratu dira, eta proiektua gauzatzeko Europar Batasunaren LIFE - Urban Klima 2050 Programaren dirulaguntza eskatu eta lortu da. Lanei dagokienez, udalaren jabetzaren lurretan jardungo da. Eremua prestatu ondoren, txabolak eta itxiturak eraitsiko dira, lurrak garbitu eta sastrakak kenduko dira. Azkenik, zuhaitz eta zuhaixka autoktonoak landatuko dira (arteak, artelatzak, haritzak eta ereinotzak, besteak beste), eta mikrohabitat berriak sortuko dira biodibertsitatea bultzatzeko.

“Lan horiek egiteko, iraunkortasuneko eta ekonomia zirkularreko irizpideak erabili dira, eta ingurumenaren ikuspuntutik ahal den guztia berreskuratu da. Ez dut zalantzarik bermeotar guztiek bisitatuko dutela inguru hau”, amaitu du zinegotzi jeltzaleak.