Bermeoko Udala

Euskeraz bizitzeko aukera ugari eskainiko ditu: Berbataldeak, ikastaroak eta tailerrak, kirola eta natura eta Gurasolagun

 

Udazkeneko, neguko eta udaberriko Berbalagun info! Buletinek Berbalagun lehiaketan parte hartzeko aukera ematen dute, saria Errigorako otzara izanik

Bermeoko Udaleko Euskara Sailak abian jarri du Berbalagun egitasmoa eta, aurten ere, “indartsu” dator. ‘Praktikatu eta bizi’ mezuarekin, egitasmo honetan parte hartzen duten pertsonei, lagunartean, euskaraz berba egiteko eta praktikatzeko aukerak eman nahi zaizkie, eskolatik eta euskaltegietatik kanpo.

Juan Karlos Agirrek, Euskara zinegotziak, Maite Alvarezek, Bermeoko Udaleko Euskara teknikariak, Marimar Hernándezek, Berbalagunen dinamizatzaileak, eta Iratze Garmendiak  AEK euskaltegiko ordezkariak, Berbalagun egitasmoa aurkeztu dute gaur prentsaurrekoan.

Euskara zinegotziak azaldu duenez, Berbalagun egitasmoa “elkarlanean” egiten da, “oso harrera ona du eta, gainera, urtez urte aberastuz doa”. “Parte hartzaileek pozik daude Berbalagunekin; izan ere, adierazten dutenez, ikasitakoa era natural batean adierazteko aukera ematen die”, esan du.

Ildo horretan, azpimarratu duenez, Berbalagunen parte hartzen duten pertsonek “lagunartean euskaraz eginez, hizkuntza bizia eta adierazkorra lantzen dute eta erraztasuna hartzen dute egunerokotasunean euskara erabiltzeko, horregatik, diogu, bada, praktikatu eta bizi”. “Giro atseginean eta lagunartean, ahalegin handirik gabe, ordutegi arazorik gabe… parte-hartzaileek erabakitzen dute noiz eta nola”, adierazi du.

Euskara teknikariak azpimarratu duenez, Berbalagun egitasmoan “edonork parte hartu dezake: euskararen bidea egiten ari denak, praktikaren bidez euskara hobetu nahi duenak edota euskaraz bizitzeko aukera gehiagoren bila dabilenak”.

Ildo horretan, zehaztu duenez, 5-6 laguneko taldeak izaten dira, eta horiek osatzeko kontuan hartzen dira parte-hartzaileen disponibilitatea, adina eta zaletasunak. “Mintzataldeak bildu  ahal dira kafetegian, tabernan edo paseoan ibiltzeko… parte-hartzaileek erabakitzen dute non eta noiz, beti lagun giroan”, gaineratu du.

“Berbalagunek euskara praktikatuz ondo pasatzeko aukera ematen du; izan ere, aisialdian egiteko egitasmoa da. Ez da eskola bat , modu ludiko eta natural batean, Berbalaguneko kideek espazio berriak bilatzen dituzte euskaraz egiteko, lagunartean euskarara hurbiltzeko eta euskara praktikatzeko”, azaldu du Marimar Hernandezek.

Ildo honetan, Hernandezek adierazi duenez, Berbalagunen parte hartzeko euskaraz berba egiteko <u>gogoa</u> baino ez da behar, euskara ikasten ari direnentzat eta euskaraz normalean hitz egiten dutenentzat ere zuzenduta baitago.

Hortaz, zehaztu duenez, Berbalagunen parte hartzeko bi modu daude, alde batetik, euskara praktikatu nahi duten pertsonak eta, beste alde batetik, bidelariak, bide hori egiten laguntzen duten pertsonak, “ezinbestekoak”, hain zuzen ere, egitasmo hau martxan jartzeko. Aipatu egitasmoan parte-hartzea dohainik dela azpimarratu dute.

Gurasolagun

Marimar Hernandez dinamizatzaileak eta egitasmoa elkarlanean bideratzen duten euskaltegietako ordezkariek adierazi dutenez, aurten ere, Gurasolagun ekimenaren bidez, gurasoek eta umeek elkarrekin euskaraz egiteko aukera izango dute.

Gogoratu dutenez, Gurasolagun familientzako berbataldeak dira; “jolasak, txangoak eta tailerrak egiten ditugu, helduak eta haurrak batera aritzeko”. “Hainbat familia batzen direnez, aukera aproposa ere bada lagun berriak egiteko”, gaineratu dute. Ildo berean, urtean bitan, gutxienez, asteburu-pasak ere antolatzen dituztela adierazi dute.

Gurasolagunen bidez, “gurasoen eta seme-alaben arteko transmisioa indartu nahi da, eta gurasoen artean euskara praktikatzeko eta erabiltzeko ohiturak eta gaitasuna indartu”.

Bestalde, Berbalagun egitasmoaren barne hainbat ekintza osagarri antolatzen direla ere jakinarazi dute, “euskal kultura ezagutu eta euskara praktikatzeko”. “Ekintza osagarrien programa zabala eskainiko da; besteak beste, bidaietako kronikak, eskulanak, dantza tailerra…”, azaldu dute.

Gainera, iazko esperientzia arrakastatsua ikusita, aurten ere, kirolaren edo naturaren inguruko jarduerak egiteko aukera izango dugu: mendilagun, bizikletaz ibiltzeko taldeak, martxa nordikoa, berbabentura (eskia, eskalada, surfa….)”, azaldu dute.

Horrez gain, herrian euskaraz izaten diren ekimenetan parte hartzen dute berbalagunek, esaterako, Irakurle txokoan, Euskaraz Bizi Nahi dut Egunean…”. Ekimen horien bidez lagun berriak egiteaz gain, herrietako kultur eskaintza zabaldu egiten da.

Aurten, gainera, Euskaraldian ere parte hartuko dute berbalagunek, Ahobizi zein Belarriprest roletan.

Ekintza horiek guztiak zabalik daude berbalagunentzat eta ez direnentzat ere. Eta horien berri zabaltzeko hainbat bide erabiltzen dira, Berbalagun info! buletina eta sare sozialak. “Aurtengo lehen info!-a azaroan zabalduko da eta informazioaren berri jasotzeaz gain, lehiaketan parte hartzeko aukera izango da, hain zuzen, azaroaren 5etik 23ra” gaineratu dute.

Lehiaketari dagokionez, azaldu dutenez, urtez urte hiru aldiz egiten da, udazkeneko, neguko eta udaberriko buletinetan, hain zuzen ere. Parte-hartze handia izaten du eta sari berezia, Errigorako otzara, alegia. Sari hori Nafarroako ikastolak eta bertako produktuak zabaltzeko eta laguntzeko keinua ere badela gogoratu dute.

Etxetik euskaraz hitz egin nahi duenak edo urruneko beste euskaldun batzuekin hitz egin nahi duenak Mintzanet zerbitzua erabili dezake, eta horren bidez, bideo-konferentziaren bidez aritu ahal izango da: www.mintzanet.eus.

Bermeoko Berbalagun sare sozialetan

Informazio eguneratua nahi duenak, eskura izango ditu Berbalagunen facebook-a eta bloga, bertan argitaratzen baitira berri guztiak, hileroko agenda eta izena emateko aukera ere eskaintzen du zuzenean.

Berbalagunen parte hartu nahi duten pertsona guztiek, beraz, Bermeoko AEK (609 462 018) eta Gotzon Garitaonaindia (688 651 491) euskaltegietara, Hizkuntza Eskola Ofizialera (94 618 7091) edo Bermeoko Udaleko Euskera Sailera (94 617 9122) deitu dezakete edota Marimar Hernandez dinamizatzailearekin 607 609 580 zenbakian kontaktatu.

Maite Alvarezek, Marimar Hernandezek eta egitasmoa elkarlanean bideratzen duten euskaltegietako ordezkariek euskaraz egiteko gogoa duten pertsona guztiei bai Berbalagun egitasmoan bai ekintza osagarrietan parte hartzeko deia egin diete “Bermeon euskaraz bizitzeko aukera ezin hobea delako”.